مشيت في الممر لحد ما وصلت قدام غرفة المريضة ومكنش فيه اي صوت غير صوت جزمتي وفتحت الصندوق اللي جنب الأوضة وحطيت المذكرات وقفلت تاني بالمفتاح...

وإحساس غريب خلاني ابص من العين السحرية على المريضة العقلية اللي كانت دائما في نفس الركن اللي في اخر الأوضة وقاعده بنفس حركة القرفصاء اللي في الزاوية واللي مكانتش بتقوم منها ابدا ده انا من ساعة ما دخلت المستشفى كنت كل ما ابص عليها اشوفها بنفس الوضع ده.

روحت وبصيت عليها وانا متأكدة اني هلاقيها على نفس الشكل لكن ظني خاني
لانه المرة دي كانت غير كل مرة
المريضة مكانتش في الركن الاخير من الاوضة ومكانتش ظاهرة قدامي في العين السحرية استغربت اوي دي أول مرة تحصل!

الشك مسكني وقولت معقول يكون حصلها حاجة بسبب اني قرأيت المذكرات وبعدين استرجعت نفسي وقولت لاء أنا اللي فكراه انه صاحب المذكرات علي كان بيحذر اللي هيقرأ المذكرات بعده ب انه الخطر هيصيبه يعني الخطر المفروض كان هيصيبني انا مش يصيب البنت دي!
والاذية دي هتحصلي مش هتحصلها هي ده لو كان كلامه حقيقي اصلا ومكانش هو كمان مجنون، وبعد تفكير عميق.

حسيت انه مفيش فايدة ومحاولاتي في اني اطمن نفسي فشلت وإحساسي بالذنب ناحية البنت ليكون حصلها ضرر بسبب اني قرأيت في المذكرات عشان ابحث عن قصتها بين السطور حسسني بالذنب اكتر وعشان اريح ضميري قررت ابص على الكاميرات بداخل غرفة المريضة علشان اتطمن انها راحت تقعد في ركن تاني وانها بخير وفعلا فتحت الكاميرات وكانت الصدمة البنت مش موجودة في الغرفة من الأساس، وقفت ابص للكاميرا بذهول ومش عارفة اتصرف دي مسئولية كبيرة البنت راحت فين وازاي هربت ولا حصلها ايه.

مكنش فيه حل غير اني افتح الأوضة وده كان ممنوع افتح اوضة مريضة عقلية في عنبر الخطر...
لكن كان لازم افتح وادخل اشوفها بنفسي مهي غلطتي وكان لازم اتحملها ايا كانت النتيجة
وفعلا جريت وجيبت المفاتيح وفتحت الباب ودخلت الأوضة وانا ببص يمين وشمال و بدور عليها لكن البنت مكنش لها اي اثر...!
اتمنيت البنت تكون بخير و موجودة في مكان الكاميرا مش مصوراه لكن مكنش فيه اي مكان مستخبي عن الكاميرا غير تحت السرير.

نزلت تحت السرير عشان اشوفها لكن الدنيا كانت ضلمة جدا مديت ايديا تحت السرير عشان اتأكد انها مش موجودة.

وفجججججأة
مسكت ايد ملمسها جلد بدون عضم او بمعنى ادق عضم مفتت!

وبعد شوية
صحيت على صوت الرعد والمطر بصيت حواليا لقيتني نايمة في غرفة من غرف المستشفى والدكتور علاء واقف جنبي
قومت وانا مخضوضة ومش فاهمة انا جيت هنا ازاي
دكتور علاء: متخافيش اهدي انتي كويسة
= كويسة ازاي انا ايه اللي جابني هنا
دكتور علاء: انا كنت بمر وبالصدفة لقيت باب المريضة مفتوح دخلت لقيتك واقعة على الارض جوه
= وهي كانت فين
دكتور علاء: هي كانت جوه في نفس مكانها اللي بتقعد فيه
= مستحيل ازاي.

دكتور علاء: سيبك من كل ده انتي اصلا ايه اللي دخلك جوه عندها انتي مش عارفة انه ممنوع وانك كده بتعرضي نفسك للخطر هي ضربتك بحاجة ولا حصل ايه خلاكي تفقدي الوعي
=هي مضربتنيش انا دخلت لاني لقيتها مش موجودة
دكتور علاء: مش موجودة ازاي انا مش فاهم حاجة منك.

= هفهمك أنا كنت بمر عادي وقولت ابص عليها ف لقيتها مش موجودة في الركن بتاعها وبعدين روحت اشوفها في الكاميرات ملقتهاش ف فكرتها هربت او حصلها حاجة ف فتحت الغرفة ودورت جوه ملقتهاش قولت اشوفها تحت السرير بس مديت ايدي وو...
دكتور علاء: وو ايه كملي
= سكت ومعرفتش اكمل كان كل اللي في بالي اني لو حكيت لدكتور علاء ممكن يتأذى معايا، بس قبل اي حاجة لازم اعرفك مين هو دكتور علاء.

ده اطيب أب ممكن تأمنه على اسرارك وحياتك ابونا كلنا بيخاف علينا زي ولاده بظبط طيبة قلبه ملهاش مثيل وعشان كده حد بطيبة قلبه مينفعش ابدا يتأذى عشان كده كان لازم اسكت ومعرفوش القصة حتى لو انا مش مصدقة كلام الشاب اللي اسمه علي صاحب المذكرات اللي قال انه اللي هيعرف القصة ويقرأ مذكراته هيتأذي، لكن مكنش ينفع اغامر بحياة دكتور علاء حتى لو كان خوفي وكلام علي مجرد وهم.

دكتور علاء: سكتي ليه هو ف حاجة حصلت ومخبياها عليا
= لاء أنا مش فاكرة اي اللي حصل غير اني بصيت تحت السرير وبعدين دوخت ووقعت مش فاكرة
دكتور علاء: يعني المريضة مضربتكيش؟
= لا هي مكانتش موجودة اصلا
دكتور علاء: بص لي ب استغراب
= ف حاجة يا دكتور بتبصلي كده ليه
دكتور علاء: ازاي مكانتش موجودة وانا لما جيت شوفتها طيب تعالي معايا كده نشوف حاجة
= نزلت وروحت معاه وفتح لي الكاميرات قدامي.

مكنتش مصدقة اللي انا شوفته شوفت المريضة كانت قاعدة مكانها وانا اللي فتحت الباب ودخلت ادور عليها في كل مكان كأني مش شايفاها
وهي موجودة جنبي في نفس الركن ونفس المكان وروحت ودخلت ايدي تحت السرير وبعدها وقعت لوراء وفقدت وعيي غريبة جدا ومش عارفة ازاي مشوفتهاش
دكتور علاء: انتي دخلتي تدوري على حاجة تحت السرير؟
= والله ابدا يا دكتور انا كنت بدور عليها هي.

دكتور علاء: بتدوري عليها ازاي وهي جنبك اهي ف الفيديو
= مش عارفة يمكن مشوفتهاش من الضلمة
دكتور علاء: انا مش مقتنع بس عشان انا مش عايز اضرك وعشان أنا اعرفك كويس ومن زمان هعدي الموضوع بس بعد كده مهما حصل متفتحيش الباب ولا تدخلي عندها تاني اتفقنا
= من غير ما افكر قولت لدكتور علاء حاضر اتفقنا اوعدك مش هتتكرر تاني.

وبعد ما خرجت من عنده روحت البيت اكلت ونمت من التعب كنت حاسة اني جسمي كله مسحوب طاقته وزي ما تكون روحي اتسحبت مني ورجعت تاني.

مش ملاحظين حاجة؟ اكيد لاحظتم أنا كمان اخدت بالي دي نفس الاعراض اللي كان بيحس بيها علي لما كان بيلمس ايد ادهم جلد بدون عضم او بشكل ادق عضم مفتت، تفتكروا دي مجرد صدفة او وهم مش يمكن اكون اتوهمت لما قرأيت المذكرات ف حسيت بنفس الاعراض وشوفت اللي علي شافه طيب علي يمكن يكون مجنون زي المريضة.

لكن انا مش مجنونة و مكنتش نايمة عشان احلم وحتى لو حسيت اني لمست ايد ادهم بس الطفل المُشوَّه ده ايه اللي هيجيبه هنا وهيدخل ازاي تحت السرير
اكيد انا لمست حاجة بالغلط واتهيألي انه هو وكان احساسي غلط، لكن خلاص انا قررت مش هقرأ مش هكمل المذكرات انا هنام واصحى اروح شغلي ومش هقرب لاوضة المريضة دي تاني مش هلمس اي حاجة تخصها تاني وهبعد خالص عن القصة دي زي ما وعدت دكتور علاء وانا عند وعدي.

وروحت ف النوم وكأني منمتش بقالي عشرين سنة...

وبعد كذا ساعة
صحيت من النوم وقومت عشان اجهز نفسي واروح ورديتي الليلية في مستشفى الامراض العقلية.

وبعد شوية
وصلت المستشفى وتممت على كذا حاجة وخرجت بره في المكان اللي بحبه وحطيت ترمس الشاي وولعت النار في جنينة المستشفى و قعدت في البرجولة اللي بقعد تحتها دائما عشان تحميني من المطر...
الجو يزهق هنا جدا مطر ورعد وبرق وهدوء هدوء ممل محتاج احداث تقلب روتين الجو ده وتحسسني بالإثارة والتشويق...
بتبصولي كده ليه انا مبرجعش في وعدي بس الفضول بيقتلنا ومحتاجين حاجة تصحينا تاني.

شكلكم فهمتوا انا بلمح لايه؟
ايوووه صح هي المذكرات اللي هتشبع فضولي وفضولنا كلنا وهتقتل الملل
انا هقوم اجيبها وربنا يستر ادعولي ميحصلش حاجة.

وقومت مشيت في الممر وجيبت المذكرات لكن المرة دي عديت
من قصاد غرفة المريضة لكن مقربتش للباب مهو أنا بردو لازم احافظ على الوعد
انا وعدت دكتور علاء اني مقربش لغرفتها بس موعدتش ب اني مش هكمل المذكرات نكمل بقى ونشوف حصل ايه.

فتحت المذاكرات على اخر حاجة وقفت عندها كانت:.

** علي: رحمة انتي كنتي بتقولي انه ادهم ده مش اسمه الحقيقي صح اومال اسمه ايه؟
رحمة: غطت وشها بالبطانية ومردتش عليه
علي,: رحمة رحمة
رحمة: انا هنام اخرج سيبني انا تعبانة اخرج
علي: بص لرحمة ب استغراب وحيرة وقفل النور والباب وخرج وهو بيفكر في كل الاحداث اللي حصلت دي لحد ما وصل اوضته ودخل سريره وبصوت تعبان ومرهق.

اليوم كان صعب اوي عليا وعليهم كلهم مكنش حد يتوقع انه اول يوم لنا في السفر هيكون فيه كل الرعب ده لكن الحمد لله اول يوم عدى على خير خصوصا بعد ما طلع مفيش رعب ولا حاجة وانه مجرد طفل مُشوَّه ومسكين
وبعد شوية علي راح في نوم عميق جدا من شدة الارهاق**...

تاني يوم في الصباح الباكر
زينات: ايه يا حج بس هتفضل قاعد كده في السرير مش هتقوم تفطر
سيف: ساكت مش بيرد
زينات: يا حج رد عليا متعملش في نفسك كده انا قولت لك ابوك ده مش هيجي من وراه غير التعب والدمار انت نسيت كان بيعمل ايه
ده مكنش بيركعها وامك اتعذبت معاه كتير اوي كان مؤذي واذى ناس كتير جدا بالسحر والاعمال اخد منهم حاجات كتير مش ملكه
سيف: ربنا يرحمه بقى.

زينات: ربنا يرحمه وكل حاجة بس انا مش مرتاحة لقعادنا هنا يا حج تعالى نسيب كل حاجة ونمشي انا خايفة عليك وعلى العيال
سيف: انا مش هسيب حقي ولازم اثبت انه الولد ده مش اخويا
زينات: هتثبت ازاي يا حج مش يمكن هي كلامها صح ويطلع اخوك الصغير ونخد ذنبه
سيف: مستحيل يكون ابويا خلفه انتي مش فاهمة ابويا كان تعبان ازاي ومكنش ينفع يخلف اصلا انا واثق من كده
زينات: اومال مين ده اللي معاها.

سيف: بعدين نعرف المهم روحي صحي الواد علي وخليه يجيلي أنا عاوز اتكلم معاه
زينات: عاوزه في ايه
سيف: يا ستي نادي الواد متسأليش كتير
زينات: حاضر يا حج وخرجت من الاوضة وراحت لعلي
وخبطت ودخلت صباح الفل يا حبيبي
علي: صباح الخير يا ماما
زينات: انت صحيت خلاص ولا هتنام تاني
علي: لاء أنا صحيت خلاص بتسألي ليه عاوزاني في حاجة؟
زينات: لاء ابوك اللي عاوزك
علي: بابا عاوزني في ايه
زينات: معرفش مقاليش.

علي: طيب انا جاي معاكي اهو وخرج معاها وراح لابوه
زينات: اهو علي جه يا حج
سيف: كويس اخرجي بقى وسيبينا لوحدنا
زينات: في ايه يا حج أنت محسسني اني غريبة يعني
سيف: اخرجي يا زينات عايز اتكلم مع ابني شوية ايه مينفعش ولا ممنوع
زينات: خلاص خارجة وقفلت الباب وخرجت
علي: بص لابوه ومستني يشوف ابوه عاوزه في ايه
سيف: اقعد يا علي واسمع الكلام اللي هقولهولك وركز فيه
علي: حاضر يا بابا وقعد.

سيف: زي ما انت سمعت امبارح الست اللي اسمها ازهار دي قالت انه ابنها يبقى اخويا وانا طبعا مش مقتنع ومش مصدقها وعاوز اعرف الحقيقة
علي: انت شاكك في ايه يا بابا
سيف: شاكك انها جابت الواد ده من اي مكان انشالله من الشارع وقالت انه ابنها عشان تخد الميراث
علي: طيب يا بابا معلش بدون قطع كلامك مش يمكن يكون ابنها فعلا
سيف: انت هتتكلم زي امك وبعدين وانت ايه اللي مأكد لك انه ابنها.

انا ابويا عيان ومبيخلفش ازاي جابه
علي: ما يمكن عشان عيان جاب الطفل ده من مراته الست ازهار وعشان كده طلع طفل مُشوَّه وبعدين معلش يا بابا هي لو فعلا عايزة تزور وتجيب طفل عشان تخد الميراث هتجيب طفل مُشوَّه ليه مهي ممكن تجيب طفل طبيعي وشكله مش ملفت زي أدهم ومثير للخوف والرعب.

سيف: ذكي انت كده ياض ومين قالك كل ده مش يمكن تكون هي تعمدت تجيب العيل متشوه بالشكل ده عشان تستعطف الناس ومحدش يشكك انه مش ابنها واللي بيقولها خلفتيه ازاي وابوه تعبان وكبير تقول مهو بصعوبة وطلع متشوه وتعرف تخد الميراث من غير ما حد يفتح بوقه معاها وضيف على ده كله انها جايبة حد مريض عشان لو كبر ميطمعش في الفلوس ويرميها بره وتفضل هي الوصية عليه والمتحكمة في نصيبه من الميراث وفي كل حاجة عنده.

علي: ايه ده يا بابا أنت كنت وكيل نيابة قبل كده ولا ايه ايه التحليل الجبار ده
اتعلمت كده منين
سيف: من الدنيا يا بني الدنيا بتعلم الناس اكتر من المدراس والكليات
علي: عندك حق صح وكلامك كمان اقنعني جدا بس هنعمل ايه عشان نثبت انه أدهم ميبقاش اخوك
سيف: احنا مش هنظلم حد انا بس عايزك تعمل تحاليل للواد ده ونعرف هو اخويا فعلا ولا لاء
علي: تحليل كشف النسب
سيف: ايوه مظبوط ده قصدي.

علي: بس ازاي ده لازم تخد منه عينة من شعره او مثلا من لعابه
سيف: ودي بقى مهمتك اللي انا طالبها منك
علي: بص لابوه وسكت
سيف: ايه قدها ولا مش قدها ولا هتخاف من عيل صغير
علي: لا طبعا اخاف ايه ده صعبان عليا
سيف: يعني هتنفذ؟
علي: ايوه إن شاء الله هنفذ اللي طلبته مني
سيف: اتفقنا المهم متقوليش لامك حاجة عشان متروحش تقع بالكلام قصاد ازهار ومتعرفش تخد العينة من الواد الصغير.

علي: حاضر متقلقش أنا هحاول اعمل كل اللي قولت لي عليه وكل حاجة هتتم بشكل طبيعي
سيف: ماشي يلا ننزل بقى الا زمان امك مستنياك عشان تقرررك وتعرف كنت بقولك ايه
علي: ههههه ربنا يستر المهم عايز حاجة مني تاني
سيف: لا يبني اتكل على الله مش عايز حاجة انت بس هات لي عينة من ادهم وانا ليا صاحبي هبعتهاله وهو هيتصرف في الموضوع
علي: ماشي يا بابا وقام ونزل تحت وفضل يبص شمال ويمين وهو بيدور على أدهم.

رحمة: بتدور على ايه
علي: هو أدهم فين مشوفتيهوش يا رحمة؟
رحمة: مش بيصحى دلوقت
علي: اومال بيصحى امتى؟
رحمة: بليل
علي: امتى يعني؟
رحمة: بعد الساعة 12 منتصف الليل
علي: ايه فيلم الرعب ده يا بنت
رحمة: انا مش بهزر وبلاش تدور عليه ابعد عنه خالص
علي: روحي العبي بعيد اجري طيب
رحمة: تنهدت بقوة وسابت علي ومشيت...

علي: طلع فوق ومشى ناحية اوضة أدهم كان عاوز يخد خصلة من شعره وفعلا فتح الباب وكان أدهم مغمض عينه ونايم
علي: نجح علي ونتف خصله من شعر ادهم والغريب انه مصحاش خالص ولا اتحرك اصلا زي ما يكون ميت مش نايم
علي: خرج من الاوضة ومشي بظهره وهو عينه على أدهم وهو نايم وبيرجع لوراء عشان يفتح باب الاوضة ويخرج.

وفجججججأة
ايد مسكت رجله.

علي: نزل تحت وفضل يبص شمال ويمين وهو بيدور على أدهم
رحمة: بتدور على ايه
علي: هو أدهم فين مشوفتيهوش يا رحمة؟
رحمة: مش بيصحى دلوقت
علي: اومال بيصحى امتى؟
رحمة: بليل
علي: امتى يعني؟
رحمة: بعد الساعة 12منتصف الليل
علي: ايه فيلم الرعب ده يا بنت
رحمة: انا مش بهزر وبلاش تدور عليه ابعد عنه خالص
علي: روحي العبي بعيد اجري طيب
رحمة: تنهدت بقوة وسابت علي ومشيت...

علي: طلع فوق ومشى ناحية اوضة أدهم كان عاوز يخد خصلة من شعره وفعلا فتح الباب وكان أدهم مغمض عينه ونايم
علي: نجح علي ونتف خصله من شعر ادهم والغريب انه مصحاش خالص ولا اتحرك اصلا زي ما يكون ميت مش نايم
علي: خرج من الاوضة ومشي بظهره وهو عينه على أدهم وهو نايم وبيرجع لوراء عشان يفتح باب الاوضة ويخرج.

وفجججججأة
ايد مسكت رجله...

علي: قلبه كان هيقف من الخضة ورجع لوراء وهو مفزوع وبيبص على اللي مسك رجله وبصوت واطي
يخربيتك هو انتي فزعتيني يا رحمة ايه اللي قعدك ف الارض هنا
رحمة: زعقت بصوت عالي وصريخ رجع اللي اخدته رجععععععه
علي: بص لرحمة ب استغراب في ايه سيبي رجلي
رحمة: زعقت اكتر في علي اخوها بقولك رجع اللي اخدته رجععععععه
علي: متزعقيش كده هيصحى على صوتك.

رحمة: مش هيقدر يصحى دلوقت ميعاده بليل بس هيعرف وهيأذيك على اللي انت عملته
علي: انتي بتقولي ايه قومي واوعي أيدك ومسك ايديها وبعدها عنه وقومها من الارض
رحمة: بصيت له وهي ساكتة
علي: انا مش فاضي دلوقت عشان ابوكي عاوزني في حاجة مهمة بس
هحاسبك بعدين على صوتك العالي ده وامشي روحي على اوضتك دلوقت يلا
رحمة: مشيت وراحت اوضتها وقفلت الباب جامد طاااااااااخ
علي: البنت دي اتجنت ولا ايه وسابها وراح لابوه.

سيف: ايه يا علي عملت ايه
علي: جيبتلك العينة اهي من شعر أدهم
سيف: جدع يا واد اهو انت كده ابني بصحيح
علي: يعني لو مجبتهاش مكنتش هبقى ابنك ههههه
سيف: بطل رغي بقى وهات العينة وضربه بالقلم بهزار
علي: خلاص يا حج اهو هههه خد
سيف: اخدها منه، وبص لعلي اهم حاجة محدش شافك وانت بتخدها
علي: حد زي مين؟
سيف: زي ازهار او الولد نفسه
علي: لاء أنا روحت اوضته و امه مكانتش موجودة الحمد لله
سيف: طيب والواد.

علي: لاء ده كان نايم كأنه ميت ومكنش بيتحرك خالص أنا حتى استغربت ده محسش بيا خالص
سيف: ممكن يكون بسبب العلاج شكله مريض او حاجة متعرفش عنده ايه بردو
علي: اها صح يبقى عشان كده رحمة قالت لي مش بيصحى دلوقت وبيظهر من الساعة 12 بعد منتصف الليل
سيف: وهي رحمة ايه اللي عرفها التفاصيل دي كلها
علي: مش عارف انا قولت يمكن سمعت من ازهار او منه.

سيف: وهتعرف منه ازاي وهي لما شافته زي ما تكون شافت عفريت وبعدين هو بيتكلم اصلا أنا مسمعتوش بيتكلم ولا مرة
علي: فعلا يا بابا هو مبيتكلمش والمرة اللي شوفته فيها بيتكلم كان زي ما يكون بيقول طلاسم مفهمتش حاجه خالص وصوته كمان كان وحش اوي
سيف: انا مش عارف الست دي جابت الواد ده منين أنا مبرتحلوش خالص
علي: بس هو ملهوش ذنب وشكله كده غصب عنه
سيف: لا مش عشان شكله انا مش عارف قلبي بيقفل كده لما اشوفه.

علي: وانا نفس الاحساس بردو والله بتقبض منه بس يمكن لانه شكله غريب عننا
سيف: يمكن فعلا المهم دلوقت أنا هروح مشوار فرصة النهار طالع والجو حلو
علي: مشوار ايه
سيف: هسافر لصاحبي عشان اديله العينة ويشوف التحاليل ويقولي
علي: طيب وهيجيب حاجة تخص جدو ازاي
سيف: انا دخلت اوضة جدك ولقيت حاجات تخصه هتنفع في التحليل والحمد لله انه محدش دخل ولا غير حاجة ف اوضة ابويا الله يرحمه
علي: طيب اجي معاك اوصلك.

سيف: مينفعش نختفي احنا الاتنين الست ازهار دي ممكن تشك وانا مضمنش اسيب امك واختك لوحدهم هنا خليك انت وانا هروح واجي ومتقلقش لو تعبت من السواقة هبقى اريح ف السكة
علي: ماشي طيب خلي بالك على نفسك كويس.

سيف: متقلقش المهم انت اطلع وقول لامك تحضر لي شنطة سفر وشوية لوازم
علي: انت هتبات هناك
سيف: يومين ثلاثة مهو التحليل بيطلع من ثلاثة ايام لستة اول ما يطلع هجيبه واجي
علي: ماشي تيجي بالسلامة أنا هروح اقولها تحضرلك الشنطة بس لو سألتني انت مسافر ليه اقولها ايه
سيف: قولها اني مسافر لواحد صاحبي عشان تعبان ودخل المستشفى
علي: خلاص ماشي هقولها دلوقت وسابه ومشي.

زينات: واقفة في المطبخ وبتحضر الفطار ورحمة واقفة جنبها
علي: دخل وراح على زينات علطول من غير ما يهزر ويلاعب رحمة زي عادته
بقولك ايه يا ماما
زينات: ايوه يا حبيبي دقائق و الفطار جاهز
علي: لا بقولك بابا مسافر
زينات: مسافر فين
علي: لواحد صاحبه تعبان ودخل المستشفى فقالي اخليكي تحضري له الشنطة عشان السفر
زينات: اها ماشي بس هو هيبات مع صاحبه
علي: اها هيبات معاه.

زينات: هو ابوك حمل مستشفيات وبيات مع حد
علي: مهو بيقولي يعني
زينات: ف ايه يولا انتم مخبيين عليا حاجة
علي: لا يا ست الكل هنخبي ايه الموضوع بس إنه صاحبه لوحده وملهوش حد ف انتي عارفة الحج صاحب الواجب كله ف طبيعي يروح له خليه على راحته بقى
زينات: ماشي روح حط الفطار على السفرة انت واختك رحمة على ما اطلع احضر لابوك حاجات السفر
رحمة وعلي بصوا لبعض وسكتوا.

زينات: في ايه مالكم يا عيال انتم متخاصمين ولا ايه
علي: اسأليها بقى هي عملت ايه دي عليت صوتها عليا متخيلة
زينات: صح الكلام ده يا بنت بتعلي صوتك على اخوكي الكبير ده هو اللي مدلعك وبيلاعبك تقومي تعملي كده هاه ردي عليا وضربتها ع دماغها ب ايدها.

رحمة: حطيت ايدها على وشها وعيطت
علي: ماما خلاص متضربيهاش خلاص وراح وقف بينهم
زينات: انت بتدافع عنها وهي معلية صوتها عليك مهو دلعك فيها ده اللي مبوظها
علي: معلش خلاص بقى اطلعي عشان تجهزي حاجة بابا
زينات: ماشي وسابتهم وطلعت.

علي: بص لرحمة
رحمة: سابته وجريت خرجت من المطبخ وخبطت ف سيف وهي خارجة
علي: شال الاطباق وطالع يحطها على السفرة
سيف: ايه يا علي البنت دي مالها بتجري كده ليه
علي: لاء مفيش حاجة طلعت تلعب
سيف: دي كانت بتعيط
علي: عشان قولت لها تعالي افطري وهي عايزة تلعب
سيف: اه طيب امك فين قولت لها ع السفر
علي: ايوه وطلعت تحضرلك الشنطة
سيف: طيب كويس اوي انا طالع لها
علي: ماشي.

سيف: دخل الأوضة ايه يا زينات حضرتي الشنطة
زينات: انت مسافر بجد
سيف: اومال بهزر
زينات: انا مش فاهمة اي موضوع السفر اللي جه فجأة ده
سيف: مش الواد قالك انه صاحبي تعبان وفي المستشفى
زينات: اها قالي بس انت مقولتش ليا الصبح انك مسافر ليه وانا كان بقالي ساعة بكلمك وبعدين خرجتني وقعدت تكلم ابنك وبعدين فجأة صاحبك تعب وحصل موضوع السفر المفاجئ ده.

سيف: اهدي بس وانا لما ارجع من السفر هفهمك كل حاجة والله العظيم هقولك وهتفرحي ليا اوي
زينات: يلهوووووووووووي افرح لك ازاي انت هتتجوز عليا؟
سيف: هههههههه ضحكتيني والله وانا شايل هم المشوار اللي رايحه اتجوز عليكي ايه يا مجنونة هو انا اقدر ابص لحد غيرك ده انتي النفس اللي بخده
زينات: اها يخويا اضحك عليا بكلمتين حلوين زي عادتك عشان معرفش اللي مخبيه
سيف: والله ابدا انتي لسه مش عارفة غلاوتك عندي يعني.

زينات: لا عارفة بس خايفة الفلوس تكتر ف ايدك وتروح تشوف بنت صغيرة وتتجوزها
سيف: والله ده لو معايا كنوز الدنيا والاخره مش هبص لغيرك ولا هيخد مكانك حد حتى لو رجعت شاب تاني هفضل احبك وانتي كبيرة
زينات: يعني انا كبيرة
سيف: هههههه شوف المجنونة بقولها ايه وهي بتقولي ايه
وبعدين بدل ما تتخانقي معايا أنا عاوزك تدعيلي يطلع اللي في بالي صح والحق يظهر ويتكشف
زينات: ربنا يظهرلك الحق مع اني مش فاهمة حق ايه.

سيف: هفهمك اما ارجع يدوب انزل دلوقت عشان لسه هسوق
زينات: ماشي يا حج بس افطر الاول
سيف: ماشي يلا واخد الشنطة ونزل.

زينات: اقعدوا كلوا
علي: جه و قعد ياكل
سيف: اومال فين البنت رحمة
زينات: شكلها مقموصة عشان كنت هضربها فطلعت اوضتها ومرضتش تفطر معانا
سيف: كنتي هتضربيها ليه هي عملت حاجة؟
زينات: قلت ادبها على اخوها الكبير
سيف: رحمة! ازاي
زينات: علت صوتها عليه.

سيف: عشان كده كانت خارجة تجري وبتعيط والواد علي بسأله قالي عشان عايزة تلعب ومتفطرش اتاريه بيكدب عليا ومقالش انها زعقت معاه عشان مضربهاش صح بس انت اللي بوظتها و كل ده من دلعك فيها يا علي
زينات: لسه كنت بقوله كده
علي: خلاص بقى يجماعة دي عيلة
وأنا اصلا مش مرتاح حاسس بحاجة غلط في رحمة حاسس انها مخبية عليا حاجة
زينات: ولا مخبية ولا حاجة دي بتدلع
علي: انا هخد لها الفطار واطلع اكلها واعرف في ايه مالها.

سيف: ياض البنت مش هتحترمك كده لازم تعاقبها
علي: احيانا العقاب بيكون سبب في انك تبعد عنك حد مش تقربه
وتعرفه غلطه
سيف: اعمل اللي انت عايزه بقى انا مش فاضي لكم ولا فاضي للعب العيال ده وبعدين انا ربيتك وطلعت زي الفل انت ربيها بقى انا معدتش حمل الدلع ده
علي: خلاص انا هتصرف واخد طبق سندوتشات وطلع في طريقه الى غرفة رحمة.

سيف: هي الست اللي اسمها ازهار فين
زينات: مش عارفة من الصبح مظهرتش
سيف: غريبة الست دي بتختفي هي وابنها بشكل مفاجئ وفجأة يظهروا
زينات: متحطش في دماغك تلاقيها مطلعتش عشان مشكلة امبارح
سيف: اه ممكن على رأيك صح بس هي في البيت بردو ولا خرجت
زينات: يمكن اخدت ابنها ومشيوا خافت من اللي انت قولته امبارح انها بتكدب وانه مش ابنها
سيف: لا ده ابنها نايم ف اوضته
زينات: وانت عرفت ازاي
سيف: ايه لا عادي.

زينات: هو في ايه بظبط
سيف: مفيش حاجه انتي كل شوية تشبطي في كلمة عشان تعملي مشكلة
زينات: انت اللي غريب زي ما تكون عامل حاجة
سيف: ياستي مش عامل حاجة أنا هقوم عشان الحق بقى السفر
زينات: ايوه اهرب من الكلام اهرب
سيف: مع السلامة يا زينااااات ادخلي واستهدي بالله واما اجيلك اوعدك هنبقى نتخانق زي ما انتي عايزه حاضر
زينات: طيب خد بالك من نفسك طيب وانت سايق
سيف: حاضر سلاااااام ونزل ركب العربية ومشي..

وبعد كذا ساعة
علي: قاعد قصاد رحمة على السرير وباصص لها
رحمة: قاعدة وحاطة ايديها على وشها
علي: وبعدين يعني انتي اللي مزعلاني وانا جيت لك اصالحك واكلك
والصبح جيبتلك الفطار وبعدها الغداء ودلوقت جايبلك سندوتشات عشان تتعشي وانتي مش عايزة تاكلي طول اليوم لازم تاكلي قبل ما تنامي الساعة عدت 12 بليل وكده غلط هتدوخي ومش عارف مش بتردي عليا من الصبح وانتي الغلطانة اصلا
رحمة: مردتش عليه.

علي: انتي اول مرة تعامليني كده يا رحمة انا زعلان اوي
وساب طبق الاكل لها وقام وقف الاكل اهو عندك و لو مش عاوزة تتكلمي معايا تاني براحتك بس لازم تاكلي عشان متتعبيش وانا رايح انام ومش داخل اوضتك تاني خالص طالما انتي مبقتيش تحبيني زي الاول..
وسابها ومشي وراح ناحية الباب عشان يخرج
رحمة: ناديت عليه
علييي؟!
علي: وقف مكانه
رحمة: انت اخدت خصلة من شعره ليه؟
علي: لف وبص لرحمة ب استغراب.

وانتي عرفتي منين اني اخدت خصلة من شعره انتي كنتي واقفة قصاد اوضته من بره ومسكتي رجلي وقتها عرفتي ازاي بقى أنا كنت جوه وقافل الباب اصلا.

رحمة: هو اللي قالي
علي: ازاي وهو كان نايم حتى الشعرة موجعتوش لما شدتها ومتحركش خالص كأنه ميت مش نايم
رحمة: قالي لما نمت من شوية هو بيعرف كل حاجة وبيشوف كل حاجة وهو نايم وجه قالي في الحلم
علي: ليه هو انسان خارق عشان يجيلك في الحلم ويقولك
يا بنتي شيلي الكلام ده من دماغك ده أدهم مجرد طفل مريض ومُشوَّه مش اكتر انتي خايفة منه كده ليه
رحمة: بعصبية
قولت لك ادهم ده مش اسمه الحقيقي مش اسسسسمه الحقيقي.

علي: اومال اسمه ايه
رحمة: بصيت له بخوف
علي: اتكلمي
رحمة: بصوت خافت * دهار...
علي: ايه؟! مين دهار ده؟
رحمة: غطت وشها بالبطانية اخرج ارجوك امشي وسيبني انام
علي: بص لها ب استغراب، ماشي هخرج بس كلي ونامي
وفتح باب الاوضة ومشي وهو حاسس انه سمع الاسم ده قبل كده
وسرح وافتكر اول يوم شاف فيه أدهم على البحر وقتها وافتكر كلام ادهم اول ما علي لمس ايده ووقع على الارض:.

** دهار دهاااااااااااار
تنا تيم مكلكو نوتيم تنا تيم مكلكو نوتيم وشاور ناحية علي ب ايديه زي ما يكون بيحذره من حاجة **.

علي: انا افتكرت دلوقت أنا سمعت الكلمة دي فين بس مين دهار وازاي ده اسمه انا لازم ابحث عن الاسم ده على النت واشوف معناه ايه الاسم ده غريب جدا واول مرة اسمعه ودخل اوضته بسرعة
وقفل الباب بالمفتاح من جوه وساب النور مطفي عشان محدش يخبط عليه ويفكروه نايم ويعرف يبحث بتركيز
ومسك تليفونه في الضلمة وكتب في شريط البحث على النت.

من هو دهار؟ وجاءت نتائج البحث صادمة وكافية انها تجمد الدم في عروق علي.

بعد أن قرأ أن:
*دهار: *هو شيطان يتسبب في إيذاء المؤمنين في النوم بواسطة الأحلام المرعب
، علي: شيطان
وفضل باصص للتليفون وهو مخضوض ومش مستوعب ايه اللي مكتوب ده وفيه في دماغه الف سؤال وسؤال لكن من الخضة والخوف كان مذهول ومش عارف لا يفكر ولا يتصرف.

وبيرفع عينه لاقى ادهم واقف في وشه في الضلمة.

تااابع ◄  عندما ينادي الشيطان